মাটি দখলক কেন্দ্ৰ কৰি বাক্সাৰ আল্লিয়াত তীব্ৰ সংঘাত ; জ্বলাই দিলে এটা পৰিয়ালৰ বাসগৃহ

জানিব পৰা মতে আজি পুৱা বৰবৰী আৰক্ষী থানাৰ নিকটৱৰ্তী আল্লিয়াত সুৰেন বসুমতাৰী নামৰ এজন ব্যক্তিয়ে দহ বাৰ জন যুৱক লগত লৈ ৰাজীৱ আলিৰ ঘৰত উপস্থিত হৈ মাটি দখলৰ চেষ্টা চলায়।আকস্মিক ভাৱে পৰিয়ালটোৰ মাটি দখল কৰিব বিচৰাত ৰাজীৱ আলিৰ পত্নীয়ে বাধা প্ৰদান কৰে। তাতে ক্ষুন্ন হৈ সুৰেন বসুমতাৰীয়ে পৰিয়ালটোৰ ঘৰ জ্বলাই দিয়াৰ ভাবুকি প্ৰদান কৰে।

কিন্তু কিছু সময় পাছতে পৰিয়ালটোৰ এটা বাসগৃহত অগ্নিকাণ্ড সংঘটিত হৈ সম্পূৰ্ণ ৰূপে ভস্মীভূত হয়।অভিযোগ অনুসৰি সুৰেন বসুমতাৰী নামৰ লোকজনে কোনো আগজাননী নিদিয়াকৈ বলপূৰ্বক ভাৱে মাটি দখল কৰিবলৈ চেষ্টা কৰিছিল।

উল্লেখ্য যে বিগত চৈধ্য বছৰ ধৰি উক্ত স্থানত ৰাজীৱ আলিৰ পৰিয়ালটোৱে বসবাস কৰি আছে। অৱশ্যে সুৰেন বসুমতাৰী নামৰ লোকজনে কি কাৰণত পৰিয়ালটোৰ মাটি দখল কৰিবলৈ গৈছিল সেই বিষয়ে এতিয়াও অজ্ঞাত হৈ আছে ভূক্তভোগী পৰিয়ালটোৱে।